DISCLAIMER: This is a work of fiction. No personal relevance made.

Ek Khayal

Kyun hoti hoon duur apne sabhi rishton se,

Kar deti hoon duur khud ya,

Ho jaati hoon duur main apne farishton se..

Vishwas nahi hota unpe,

Ya dagmagata hai bharosa mera apne aap se,

Begane se lagte hain log,

Kabhi duur mile, ya kabhi paas se..

Milte hain log mujhe kyun,

Lagta toh hai ki woh hamesha mere saath hain,

Par milna chahe jab mann kisise,

Toh milta hai yeh mann hamesha udasi aur tanhayi se..

Lagta hai ki mile hain log,

Jeevan ke utaar chadhav mein,

Lekar koi wajah,

Ya keval umang ya utsah mein..

Mann toh yahi sochta hai ki,

Mile hain toh saath rahenge,

Par darr laga rehta hai ki,

Kabhi na kabhi yeh bhi alvida kahenge..

Sochti hoon bas yunhi ki,

Yun toh jeevan mein kitne farishtey aayein hain,

Kuch ne saath naa choda,

Par kuch ne nazarein churayi hain..

Saath jinhone nibhaya,

Dil khush hai ki unse abhi na judai hai,

Phir bhi jhanke mann ke kisi kone mein dekhe,

Toh ab bhi isme kahin samai tanhayi hai...!